Vaxt keçəcək, dövr edəcək,
Qan-qadalı hərb bitəcək,
Yağıları qovacağıq bu torpaqdan.
Mütləq geri alınacaq
Şuşa, Ağdam,
Geri alacağıq
Kəlbəcəri,
Laçını da,
Qarabağa bütün
Yollar açılacaq.
Hərb bitəcək, ağrıları
Göynədəcək zaman-zaman.
Övladları həlak olan
Analarsa bu dəhşətə
Dözməyəcək...
Hərb bitəcək,
Amma onun üstümüzdən
Getməyəcək kölgələri.
Görən necə böyüyəcək
Məmləkətin yüzlər ilə, minlər ilə,
Yetim-yetim körpələri?..
Neyləyəcək sevdiyini
Qurban verən sevgililər?..
Qəlblərində həsrət, qübar,
Nə vaxtacan qara geyib
Ağlayacaq nişanlılar?..
Hərb bitəcək, ağrıları
Odlayacaq sinəmizi...
Şəhidlərin göynəkləri
Kəsməyəcək...
Onlar bizi and verəcək
Bir Allaha,
Aldanmasın millət daha...
Aldanmasın baxa-baxa, görə-görə
Nə daxili, nə xarici
Düşmənlərə...
Hərb bitəcək, amma onun
Bitməyəcək sualları...
Vaxt keçəcək, dövr ötəcək,
Qan-qadalı hərb bitəcək...
İnamım var böyük qələbənin gəlişinə...
Onda necə çıxacaqlar
Çox xainlər el içinə?..
Soruşuram dönə-dönə, təkrar-təkrar,
Hansı üzlə tıxacaqlar
Çörəyini bu torpağın?..
Bilməm hansı qəbrə qoyulacaq,
Xalq acından saralanda
Topdağıtmaz sarayında,
Hər gün öpüb əndamını,
Göz-qaşını,
Öz erməni aşnasını
Gizli yerdə yağ içində saxlayanlar,
Amma üzdə millət deyib ağlayanlar...
Hərb bitəcək, çəkiləcək
Ağrıları, qorxuları...
Amma heç vaxt bitməyəcək
Sualları, sorğuları...