Üstəlik: kim deyə bilər ki, məhəbbət təbii hissdir? Məhəbbət - xəstəlikdir; xəstəlik üçünsə heç bir qanun yazılmayıb. Əgər məsələ arabir ürəyimdən qopan ağrı ilə qurtarsaydı yenə dərd yarı idi; axı, mənim bütün varlığım alt-üst olmuşdu. İndi siz məni başa salın: pis nədir, yaxşı nədir, buna səbəb nə idi, hər hissin, hər duyğunun ayrı-ayrılıqda nə kimi bir mənası var?
Cəsarətsiz və tək adamların - xudpəsəndlik ucundan - bədbəxtliyi məhz orasındadır ki, gözləri olsa da və nə qədər diqqətlə baxsalar da onlar ya heç nə görmürlər, ya da rəngli eynək taxanlar kimi, hər şeyi boyalı görürlər.