İki dost: Biri bəstəkar Clive, digəri mətbuatda baş redaktor Vernon. Uzun zaman sonra onlar köhnə sevgililəri Molly-nin cənazəsində görüşürlər. Bu cənazədən sonra hər ikisinin həyatında və əxlaqi tutumlarında dəyişikliklər baş qaldırır. Molly-nin özü dünyadan ayrılsa da, ölümü köhnə sevgililərini bir araya gətirir. Təkcə Clive ilə Vernon-u yox, başqalarını da. Bu birləşmə ilə hekayə yeni çalarlar qazanır, oxuduqca həyəcanlandırır, əsəbiləşdirir, gözlənilməz sonluğu ilə də xeyli təəccübləndirir.
Oxuduğum bir çox romanda hadisələr səbəb-nəticə əlaqəsi ilə qurulub. Burada bir az fərqlidir. Əvvəlcə nəticəni görürsən, sonra səbəblər açılır. Hər bölüm səni belə şoka salır. Xarakterlər oxuduqca içində böyüyür. Bir bölümdə oxuyub söydüyün obrazı, ikinci bölümdə başa düşürsən. Roman üçüncü şəxsdən yazılsa da, daxili və xarici məsələlər o qədər real alınıb ki, xarakterlərin hekayəsinə sanki onların dilindən yazılan mətnlə şahidlik edirsən. Yəni birinci şəxslə.
Daha çox daxili münaqişə ilə, fiziki bir qarşıdurma olmadan Ian Mcewan qəşəng bir duello yazıb. Buradan ona minnətdarlığımı bildirir, külliyyatını da bitirməyi hədəfləyirəm. Beləcə şəxsən özünə edə bilməsəm də, uzaqdan bir yerdən ona təşəkkür də etmiş olaram