Səni düşünürəm ki, yağış yağsın
Səni düşünürəm ki, hava açsın,
Günəş doğsun.
Səni düşünürəm, Səni...
Unuduram ki,
Səni düşünmək günəşdir elə,
Küləkdir Səni düşünmək,
Yağışdır;
Səni düşünmək, əzizim,
hər tində rastıma çıxan ən qəribə tanışdır.
Səni düşünmək...
...qaçışdır.
Səni düşünürəm ki, küsülülər barışsın.
Silahlar sussun deyə düşünürəm Səni
Və susur silahlar,
və bağışlanır günahlar;
Tövbəmidir, yoxsa Səni düşünmək - əfvdir, rəhmətdir?
Səni düşünmək...
oğrun-oğrun,
gizli-gizli...
Səni düşünmək, əzizim, çox böyük cəsarətdir.
Yollar bitməsin deyə düşünürəm Səni
Gedənlər getməsin deyə düşünürəm Səni.
Manaf dayı ölməsin deyə,
Səmiş bilməsin deyə
atasının, əslində, öldüyünü;
Nəcibə xala sağalsın deyə
Düşünürəm
Səni!
Səni düşünmək şəfadır!
Əhdə vəfadır Səni düşünmək,
haraydır-sədadır
Səni düşünmək, əzizim,
qəbul olmuş duadır!
Budur, Səni düşündüm indicə yenə
Və dünya mürgülədi
çiçəklər əsnədi
körpələr uyudu...
Budur, Səni düşündüm indicə yenə
və... fikrim dağıldı;
Səni düşünmək, sən demə, əzizim,
ən şirin,
ən qəşəng nağıldır.
İlqar Kamil
·
51 görüntüleme
Yorum yapabilmeniz için giriş yapmanız gerekmektedir.