Həmin gün görüşmək
Gəl qayıdaq əvvələ,
yad olaq biz bir anlıq.
Hər tərəf ala-toran,
ətraf duman, qaranlıq.
Mən yollanım keçmişə,
qoy qayıdım dünənə,
Sənin həyat yolunu
mənim həyat yoluma
calaşdıran bu yolu
təzədən gəlmək üçün
Mən təzədən qayıdım
həmin döngəyə, tinə.
Sənə gələn yolları
mən bilmədən keçmişəm.
Fərqinə varmamışam,
düşünmədən keçmişəm.
Əynimdə kürküm olub,
üşümədən keçmişəm.
Xəbərsiz biri kimi,
düzəlmək istəmirəm
sənə gələn bu yola.
Qatıb məni önünə
istəmirəm gətirsin
səbəblər naşı kimi.
Atılmaq istəmirəm
bir sapand daşı kimi.
Bu yolları qət edim,
İradəylə, qərarla,
Sənə yetişmək üçün
qaçıb gəlim fərarla.
Əzabına qatlanıb,
əziyyətindən keçim.
Bu şəhərə gəlməyi,
bu yola düzəlməyi,
həmin gün görüşməyi
səbəblər yox, mən seçim.
Yenidən tapım səni,
dünənə boylanmayım,
Sabahı düşünək biz,
ümid qalsın yarında.
Dünəni xatırlayıb
həsrət ilə yanmayım,
Unudum keçmişimi,
itim baxışlarında.