Efendimsin, cihânda i’tibârım varsa sendendir.
Meyân-ı âşıkânda iştihârım varsa sendendir.
Benim feyz-i hayâtım hâsılı rûh-ı revânımsın,
Eger sermâye-i ömrümde kârım varsa sendendir.
Veren bu sûret-i mevhûma revnak reng-i hüsnündür,
Gülistân-ı hayâlim nev-bahârım varsa sendendir.
Felekden zerre mikdâr olmadım devrinde rencîde,
Ger ey mihr-i münevver âh u zârım varsa sendendir.
Senin pervâne-i hicrânınım sen şem’-i vuslatsın.
Ber-her şeb hâhiş-i bûs u kenârım varsa sendendir.
Şehîd-i aşkın oldum lâle-zâr-ı dâğdır sînem,
Çerâğ-ı türbetim şem’-i mezârım varsa sendendir.
Gören serkeştelikde gird-bâd-ı deşt zanneyler
Fenâ-ender-fenâyım her ne varım varsa sendendir.
Niçün âvâre kıldın gevher-i galtânın olmuşken,
Gönül âyînesinde bir gubârım varsa sendendir.
Şafak-tâb eyledin peymânemi hûn-âb ile sâkî,
Sabâh-ı sohbet-i meyde humârım varsa sendendir.
Sanâdır ilticâsı Gâlib’in yâ Hazret-i Monlâ
Başımda bir külâh-ı iftihârım varsa sendendir.