"Aləmdə səsim var mənim" Azərbaycan yazıçısı Əzizə Cəfərzadənin ilk romanıdır. Yazıçı romanı əvvəlcə "Məhəbbət günahdırmı?" adlandırmaq istəmiş, lakin əsərin nəşri zamanı dəyişib Seyid Əzim Şirvaninin şeirindən götürərək "Aləmdə səsim var mənim" adlandırmışdır (yaxşı ki).
İlk romanı olan bu əsərdə Əzizə Cəfərzadə yaradıcılığına və şəxsiyyətinə böyük məhəbbət bəslədiyi şair Seyid Əzim Şirvaninin bədii obrazını yaratmış, XIX əsr Şirvan tarixini və həyatını təsvir etmişdir.
"Şamaxı yollardan başlayır..." - deyə əsərə başlayan yazıçı bir həyatı, bir mühiti, bir mübarizəni nəql edir, hekayə davam etdikcə bəzən haşiyəyə çıxaraq bəzi məlumatları çatdırır oxucuya.
Əsər Seyid Əzimin gənclik illərindən başlayır, onun xalqı maarifləndirmək uğrunda apardığı mübarizələrlə davam edir. Burada şairi bir müəllim, ailə başçısı, bir aşiq olaraq müşahidə edir, şəxsiyyətinə pərəstiş hissi ilə oxuyuruq. Sonlarda isə artıq Seyid Əzim qocalmış, ətrafında düşmənləri çoxalmışdır. Onu xalqın dərdi qocaltmışdır... Və əsər şairin vəfatı ilə bitir. Lakin yazıçı burada oxucuya çatdırır ki, dünyadan köçən şairin cismidir, ruhu hər zaman bizimlədir. Seyid Əzimin səsi aləmdə hər zaman yaşayacaq...
Mövti-cismani ilə sanma mənim ölməyimi,
Seyyida, ölmərəm, aləmdə səsim var mənim!
_________
Əzizə Cəfərzadə yaradıcılığından oxuduğum ilk əsər oldu yazıçının ilk romanı. Gözəl əsər idi. Amma olduqca ağır irəliləyirdi. Bəzi hissələrdə ani keçişlər var idi ki, əvvəldə baş verən hadisə yarım qalırdı, sanki. Bəzi hissələrdə isə hadisələr bir az uzun və sıxıcı davam edirdi. Bu da yəqin ki, yazıçının ilk əsəri olduğundan qaynaqlanırdı.
Ümumi olaraq bəyəndim. Əsərdə sevdiyim nüanslardan biri yazıçının müəyyən hissələrdə hekayəni dayandırıb haşiyəyə çıxaraq izahat verməsi, şairə duyduğu məhəbbəti hiss etdirməsi və gələcəklə bağlı bəzi məlumatlar verməsi idi.