1136 Ulu Belinde çok zamânlardan beri Mirzâlar arasında zuhûr eden ihtilâf tamâmen kendini gösterdi. Şöyle ki: O senesi (Er Mirzâ Aga) bin İnâyetşah, Argın Begi olan Ahmed Şâh bin Bahâdır Şâh Begin kızıyla akd-i nikâh etdi. Halbûki Sübhân Agazâde Murâd Şâh Aganın oglu (Kutlu Şâh) Mirzâ mukaddemen müşârunileyhe kıza namzedligini bildirmiş ve o yolda bazı mükâlemede sebkat etmişdi.
Bu vaka üzerine Kutlu Şâh Mirzâ Hâna müracâ‘at etdi. Han dahi, mûmâi‘leyhin pederi evvelce (nöker) ve (vezîr) mesnedlerinde bulundugundan tolayı Kutlu Şâh Mirzâyı şâyân-ı himâye görerek bir fermân ile "kız, Kutlu Şâh Mirzâdan gayrıya tecvîz olunursa alan virenden her ikisinin mücâzâtlandıracagını" bildirdi.
(Er Mirzâ) Aga Hânın gazâbına ugramakdan tevahhuş idüb bir müddet tereddüd gösterdi ise de nikâhlısından dahi vazgeçmiyordu. Nihâyet tahlîs cân ve cânân içün Haratok ve Salgır halkına ilticâ etdi. Ve onların maiyyetiyle Şirin Hândânına mürâcaat idüb yardım taleb etdiler. Şirinler dahi Cântimur Mirzâya gidüb "Cümlemizin pederimiz makâmında büyügümüzsünüz, bu kardaşımıza zulm ediliyor, sâhiblik idesiz" diye ricâda bulundular.
Bu haber Hâna işidilince büsbütün kızdı ve Er Mirzânın katlini tasmîm etdi. Şirin ve sâir ümerâ tarafından afv istirhâmında bulunuldu ise de çâresiz olmadı. Hânın tavrından korkdular. (Muharrir-i ahvâl olan bu fakîr -‘Abdü'l-Gaffâr Efendi- ol vakit livâ-yı Şirinde hâkim-i şer‘ idim. Geregi gibi vukûfum vardır ki sıhhat üzere beyândır.) Bir kaç gün sonra Han ümerânın teklîfini kabûl ile Er Mirzâyı afv ettiyse de Mirzâlara itmi‘nân gelmediginden tolayı cemiyyetlerini tagıtmadılar.
O sıralarda (Haratok) halkından (Yediler ta‘bîr olunan bir kısmının Han tarafını geçdiklerinden mugber olan birkaç hafifmeşreb genclerin (Yediler) halkının emvâlini yagma etdiler. Genclerin bu hareketi ihtiyârlara, Mirzâlara atf edildi. Fakat hiçbirinin evvelce bu yagmadan haberleri yokdu. Hattâ bu hâli tuyar tuymaz heman gencleri men‘ idüb gâretzede kimselerin bütün eşyâ ve emvâlini istirdâd etdiler. Bunınla berâber ihtilâf bütün mânâsıyla ateşleniyordu. Bunun üzerine cemi‘ ümerâ toplanub (Salgır)lılardan za‘îfu'l-basar, okur Temir Şâh nâm zâtı Hâna gönderüb terk-i saltanat etmesini teklîf etdiler. Han, Nûre’d-din Girayın bir mikdâr askerle cemiyyetlerini târ u mâr etmek lâzım olduguna dâ’ir vukû‘ bulan teklîfini kabûl itmeyerek mütegallibenin teklîfini kabûle mecbûr oldu.
·
118 görüntüleme
Yorum yapabilmeniz için giriş yapmanız gerekmektedir.