Xorto!
maşallah ji zanîna te re,
te xitim kiriye zanist,
daqurtandiye îlmê Marks
xuyaye tu dizanî ku Lenîn
kîngê û li kuderê çi gotiye
herçî Engels e
divê ji te bê pirsîn
bi vê zanîna xwe xorto
te îlmê Marksîzmê qedandiye.
Her weha tu xorto
wek xortekî Enternasyonal
bêguman tu hay ji Wîetnamê,
Qamboçyayê,
Kûbayê,
Erîtreyê,
Guatamalayê...
heta tu hay ji çar aliyê dinê heyî.
bi ser de tu xorto,
tu nav bi nav
şoreşgerên navneteweyî dinasî
tê bêjî te,
di milê Qastro û Che Guevara de şer kiriye!
hella ji zanîna te re
hella û barîkellah,
hella û sed maşallah,
aferîm ji te re xorto!
tu her bijî xortê Enternasyonal!
niha ez fêm dikim,
tu çima napeyîvî bi Kurdî
dostê hêja,
hevalê delal
belê bi destûra te:
ez dixwazim ji te bikim çend pirs û sûal
gelo tu bi Eliyê Herîrî dizanî?
te qet bihîstiye Melayî Cizîrî?
te qet xwendiye Ehmedê Xanî?
te hay heye ji Feqiyê Teyran,
Ubeydullah Nehrî, Bedirxan Begê Botî,
Şêx Mehmud Berzencî, Şêx Seîdê Kal,
Seyid Riza, Celadet Bedirxan,
Qadî Mihammed,
Serok barzanî
ka bêje xorto
tu li ser vana çi dizanî?
xorto!
bo çi eniya te qermiçî!
bo çi tu lêva xwe gez dikî!
bo çi tu mirûzê xwe nexweş dikî!
tewer ew rûtirşiya te!
nebû xortê delal nebû!
ji kerema xwe xorto
tu wê Enternasyonaliya xwe
li dereke din bifiroşe
hêviya min ji te,
bese êdi!
me nedoşe.
··
145 Gösterim
2 Yorum
Lütfen giriş yapınız.
Kurdên marksîst netewehez in, piraniya wan zimanê xwe baş dizanin, bi zimanê xwe diaxivin, dixwînin û dinivîsin.