At rəsmlərinin izində-Dryu Hayden Teylor
Roman ilk baxışda sakit axan, yavaş templi bir hekayə təsiri bağışlayır. Kitabın əvvəlində müəyyən qədər sıxılma və marağın gec formalaşması mümkündür. Lakin hekayə irəlilədikcə, xüsusən də at rəsminin simvolikasına verilən dərin mənalar açıldıqca oxucu mətnin içində daha rahat hərəkət etməyə başlayır.
Atın simvolikası və hekayədəki yeri
Müəllif at obrazını sadəcə vizual bir motiv kimi deyil, insanın daxili enerjisini oyadan, azadlığa çağıran bir simvol kimi təqdim edir. Romanda at sanki “çağırışa cavab verən enerji”dir: bir insan içindəki təlatümə siqnal verdikdə, bu enerji (at) ona tərəf gəlir. Bu, həm psixoloji, həm də metaforik baxımdan təsirli işlənib.
At:
azadlığın,
gücün,
nəcibliyin,
daxili həyəcanın və inkişafın
simvolu kimi çıxış edir.
Danielin at çəkməsi, əslində, özünün böyümək, sərhədlərini aşmaq, yaşadığı çətinliklərdən qurtulmaq istəyinin vizual ifadəsidir. O, sanki çəkdiyi hər atlə öz gələcəyini formalaşdırır, özünü yetişdirir.
Obrazlar və psixoloji işlənmə
Kitabın ən güclü tərəfi obrazların psixoloji dərinliyidir.
Daniel
Hardan gəldiyini və nələr yaşadığını gizlətməyən, çətinliklər içində formalaşan, həssas və bir o qədər də güclü bir obrazdır. Ailəsindəki zorakılıq onun iç dünyasını daha tez oyadır və at rəsmi onun üçün həm sığınacaq, həm dil, həm də iç azadlığına aparan yol olur.
Şelli
Müəllif tərəfindən “güclü qız obrazı” kimi qurulub. Əvvəlcə kobud, bəzən sərt görünür, lakin hekayə inkişaf etdikcə onun xarakterində yumşalma, dəyişmə və daxili böyümə hiss olunur. Şelli həm özünü, həm dünyanı anlamağa çalışan, həyatın ritmini tapan bir obrazdır.
Ralf
Ralfın timsalında biz daha mərhəmətli, başqalarını anlamağa meyilli, sakit, insanilik dolu bir obraz görürük. Onun uşaqlığı ilə böyüklüyü arasında qurulan keçidlər kitabın emosional əsasını təşkil edir.
Viliyam
Viliyam istiliyi olmayan, çox uşaqlı ailədən gəlirdi və içindəki boşluğu tez-tez digər uşaqlara kobud davranmaqla ifadə edirdi. Lakin bir hadisə onun Danielin ailəsi ilə öz ailəsini müqayisə etməsinə, nəticə çıxartmasına səbəb oldu. Görünür, həmin an Viliyam həmişəlik dəyişdi. Bu, əsərin ən gözəl və təsirli məqamlarından biri idi.
Komfort həmişə inkişaf gətirmir.
Şelli və Ralf nisbətən rahat ailələrdə böyüyür, lakin həyatla münasibətlərində müəyyən “gerilik” və ya durğunluq sezilir.
Daniel isə çətinliklər içində olmasına baxmayaraq daha erkən yetkinləşir, daha dərindən hiss edir və özünü ifadə etməyi bacarır.
Bu kontrast müəllifin sosial reallığa işarəsi kimi oxuna bilər.
Əsərin zəif və güclü tərəfləri
Romanın emosional və simvolik xətti güclüdür, obrazlar canlı və real təsvir olunub. Lakin süjet baxımından kitabı “çox güclü, şah əsər” səviyyəsinə qaldıran dramatik xətt və ya təhkiyə gücü yoxdur. Əsər daha çox atmosferə, psixologiyaya və simvolik dilə söykənir.
İnsanın içindəki təlatümü, azadlıq istəyini və özünü kəşf prosesini rəsmin — xüsusən at obrazının — simvolik gücü ilə birləşdirən psixoloji baxımdan təsirli bir romandır. Bəlkə də böyük bir şah əsər deyil, lakin müəllifin yaratdığı simvollar və obrazların daxili inkişafı oxucuya uzunmüddətli təəssürat buraxır.
8 Gösterim
Yorumlar
Lütfen giriş yapınız.