destê tenê deng jê nayê
tişt pê nayê
bila hinek ji me kesk bin,
hinek sor bin,
û hinek jî zer...
lê gava em bigihêjin hev
em bibin per ala me li ezmanan bibe stêrkeke serzer
werin!
bi kefa ser devê xwe werin
pê li serê hev bikin û werin
dê weledê xwe bavêjin û werin...
ecele!
di kîjan qulê de marekî we
di kîjan şikeftê de harekî we hebe
derxin, col bikin, li hev vehewînin
ku ev jî ne bes be
rakin ji gorê hemû lehengên xwe yên sexte
bidin dora xwe heta bi miriyên xwe biqûrin
bizûrin
û werin!
Şoreş elmas in bi berxwedanê ji binê erdê tên derxistin
gerek dijmin ji xwe re baş zanibin
di nav kurdan de ti carî lawên bavan naqedin
em çiya ne, stûnên dinyayê ne...
dilê min pîvazekê tûj e
serê xencera min ji ber hêsir dike
ez hogirî te bûme
wek hovekî ku hîn nû ji xwe re agir keşf kiribe
gerek ez te têxim dilê xwe