Yarpaqlar arasından uzadaraq əlini,
Oxşayaraq telini,
Gecələr darayaydı saçlarını ay, gözəl!
Sən gözəlsən, ay gözəl..
Əllərində əllərim, gözlərində gözlərim...
Asılaydı sözlərim
Könlünün qulağından bir qızıl tana kimi,
Günəş doğana kimi.
Gözlərindəki yumşaq kədər,
görüş vədəli səhər.
Sənə,
ancaq sənə deməli sözlər,
gəncliyimizin şahidi-şəhər,
daha nələr, nələr üçün darıxıram.
Darıxıram, sükutun,
səsin üçün;
Məhəbbət qoxulu nəfəsin üçün.
"Danış! Danış" ın,
"bəsdir, bəs" in üçün
darıxıram.
Saçlarının hər teli,
gözlərinin könlümcə
dili üçün
darıxıram.