Roman universitet tələbələrinin Məzun gecəsində – 15 iyul 1988-ci ildə Müqəddəs Svitin günündə təsadüfən tanış olan iki gəncdən – Emma ilə Deksterdən bəhs edir. Yarımçıq qalmış bir gecənin sabahı ayrılırlar. Hərə öz yetkin ömrünü qurmaq yoluna qədəm qoyur. Və bundan sonra müəllif iyirmi il ərzində iki adamın Bir Gününü, həm də məhz iyulun 15-də, Müqəddəs gündə anlatmaqla romanı davam etdirir; yazıçı üçün iki insan həyatını bir günün dar yuvasına sığdırmaqla təsvir etməsi son dərəcə çətin görünən vəziyyət olsa da, bu, oxucu üçün misilsiz həzz qaynağına çevrilir.
“Hər bir oxucu bu kitaba heyran olacaq. Hər bir yazıçı isə bu kitabı özünün yazmış olmasını arzulayacaq”, – David Nikolsun BİR GÜN romanı haqda deyilən bu sözlər tanınmış ingilis yazıçı-publisisti Toni Parsonsa aiddir. Bir yandan isə “Belfast Telegraph” belə yazır: “Bir gün”ün üstündə Səhiyyə Nazirliyinin bu xəbərdarlığı yazılmalıdır: “Bu kitab son dərəcədə alışqanlıq yarada bilər…” Seçimi oxuculara buraxsaq da, sıradan BİR GÜNÜN həyatımızdakı yerini bilmək istəyənlərin seçimini qabaqcadan görmək elə də çətin deyil…
