“Əlinin İsadan üstün olduğunu deməyə dinim, İsanın Əlidən üstün olduğunu qəbul etməyə isə vicdanım icazə vermir” deməklə Hz. Əliyə çox böyük sevgi bəslədiyini etiraf edən livanlı xristian şair, yazıçı və dramaturq Corc Cordağın “İmam Əli (ə) İnsan ədalətinin səsi” əsəri dünya müsəlmanları tərəfindən böyük rəğbətlə qarşılanmışdır. Onun beş cilddən (Əli və insan hüquqları, Əli və Fransa inqilabı, Əli və Sokrat, Əli və yaşadığı mühit, Əli və ərəb etnosu) ibarət olan bu əsəri ingilis, fars, urdu və s. dillərə tərcümə edilmişdir.
Əsərin Azərbaycan dilinə tərcümə etdiyimiz “Əli və insan hüquqları” adlı cildində müəllif Hz. Əli dühasının müxtəlif yönlərini təsvir etməyə çalışmışdır. Corc Cordaq ucsuz-bucaqsız, susuz və bir sözlə, həyatın özünü belə məhv edən bir səhrada Əli (ə) kimi bir şəxsiyyətin dünyaya gəlməsini möcüzə hesab edir. İnsanlığın bütün ali dəyərlərini qum dənəcikləri kimi qovurub məhv edən bir mühitdə bəşəriyyətə yüksək dəyərlər bəxş edən qüvvə yalnız möcüzə ola bilərdi.
Corc Cordaq bu cilddə İmam Əlinin davranışları və kəlamları əsasında onun bəndəçilik, zahidlik, alicənablıq, səxavətlilik, ədalətlilik və sair kimi şəxsi keyfiyyətlərini, azadlıq, demokratiya, rəhbərlik, fərd və cəmiyyət, sülh və müharibə, zalım və məzlum anlayışları ilə bağlı mövqelərini işıqlandırmışdır.
