Melodramatik süjeti olan romanın 1-ci kitabında erməni işğalçılarının Dağlıq Qarabağda etnik təmizlənmə aparıldıqdan sonra xarici güclərin köməyi ilə düzən Qarabağa hücumundan, aborigen əhalinin min illərlə yaşadığı yurdlarından qovulmasından, Bakıdan ata yurduna toy mərasiminə gəlmiş gənc jurnalist Aysunun girov götürülməsindən, onun düşdüyü ağır durumdan danışılır.
2-ci kitabda hadisələr Qarabağın güneyindən mərkəzinə-Şuşa və Xankəndi şəhərlərinə keçir, girov Aysu Şuşaya gətirilir. Qarabağın bu baş şəhərinin işğaldan sonrakı durumu, Şuşa həbsxanasında saxlanan azərbaycanlı əsir və girovların cəhənnəm əzabı yaşamaları haqqında danışılır. Sonrakı fəsillərdə Füzuli bölgəsində 22 kənd və qəsəbənin düşməndən təmizlənməsindən və s. acılı-şirinli, ölümlü-qalımlı tarixi yaşantılardan bəhs edilir.
3-cü kitabda əsəbləri çox pozulmuş Aysunun körpə əkizləri ilə Bakıya dönməsindən, Azərbaycan dövlətçiliyinə qarşı hərbiləşdirilmiş müxalif güclərin ləğv edilməsindən, təmas xəttindəki toqquşmalardan, Qərb dövlətləri tərəfindən təzyiqlərə məruz qalmasından, cəmiyyətdəki təzadlardan söhbət açılır, Azərbaycan Ordusu hərbiçilərinin təkbaşına qeyri-bərabər sayda düşmən dəstələri ilə döyüşə girməsindən, öz ölkələrini tərk edən Ermənistan vətəndaşlarının Azərbaycana da pənah gətirməsindən və nəhayət tarixi Aprel döyüşlərindən bəhs edilir.
