"Bütün hallarda azadlıq əsasdır. Onsuz səy və bilik- lərimiz boşa gedər, yayılmaz. Buna ən yaxşı sübut azad olanlarla olmayanlar arasındakı fərqdir. Yəni tənqid və sərbəst düşüncədir. Bax, o düşüncə hər cür biliyə yol açar, boş əqidələri beyindən atar, yanlış yollardan qoruyar, səhvləri düzəldər, fəaliyyəti doğru yola yönəldər."
Əhməd Bəy Ağaoğlu "Sərbəst insanlar ölkəsində" bədii bir dillə azad yaşamağın gərəyini habelə onun hüquqi və siyasi tərəflərini göstərməyə çalışmışdır. Şərqlə Qərbin qarşılaşdırılması, despot və demokratik cəmiyyətin fərqləri və bu qəbildən məsələlərə toxunan mütəfəkkir öz millətinin yoluna işıq salmağa çalışmışdır. Azadlıq nədir? Necə azad olmaq olar? suallarına müəllif sadə bir dillə cavablar vermişdir.
