Yadındadır?
Payız idi…
Yadındadır?
O ilk baxış?
Baxışından elə çaşdım,
Sənə qaçdım…
Azca ayağım büdrədi, mənə güldün…
O payız o gülüşünlə
Çiçək açdım…
O payız dünya gözümdə
Qızlıq, qadınlıq taxtıydı.
Sənə niyə inanmışdım?
Mənə “gülüm” deyəndə sən
Güllərin solan vaxtıydı…
Yadındadır?
Uzağa baxıram deyərdin mənə
Uzaqgörən deyiləmmiş…
Gözləmədiyim tərəflərdən
Gəldin, amma
Gözlədiyim tərəflərdə yoxsan indi…
O istəyin, o həvəsin
O payızdan bu payıza
Qayıdarmı bir də geri?
Özün doldura bilmirsən
Xəyalın dolduran yeri.
Nuranə Nur
Mən quzeyin "gün çıx","gün çıx" naləsi,
Çatmaz mənə günəşin bir haləsi.
Ey güneyin qanad açan laləsi,
Apar məni bu ümidin dalınca....
من قوزئیین"گون چیخ،گون چیخ!"نالهسی
چاتماز منه گونشین بیر هالهسی
ائی گونئیین قاناد آچان لالهسی!
آپار منی بو اومیدین دالینجا...
Söz adamı Alış yan,
Öz-özünlə barış yan!
Ən böyük dərd budur ki,
Sünbül-sünbül tarladan
Bir dən sənin olmasın.
Adın vətəndaş olsun,
Vətən sənin olmasın.
Biz də ağaclar kimiyik;
Baltalanan, rəndələnən,
Budaq-budaq sındırılan
Üryan qalmış ağaclarıq…
Vaqonlarda, "barak"larda,
Ayaqlarda,
Zülümlərdə, ölümlərdə,
Sürüdüblər, axıdıblar
Çay yuxarı insanları
Çay aşağı şalbanları.
Yox, sənə yox, danışmıram.
Sən cavanı, sən qocanı nə biləsən.
Sürgünlərdə çıxan canı nə biləsən.
