Bizan ku min yar tu yî
Dil jê birîndar tu yî
Ez kuştim yekcar tu yî
Çibkim ku min çare tu yi
Bê destî hem par tu yî
Pir li min kubar tu yî
Ê bi xezeb xendê ez im
Di qeyda bendê ez im
Zincîr bi zendê ez im
Muştaqê rindê ez im
Aşiqê cundî ez im
Perwazê findê ezim
Xweş-qeda eîla tu yî
Cama peyala tu yî
Xweş bejin bala tu yî
Delal di mala tu yî
Berbextê tala tu yî
Nîmetê ala tu yî
Daîm dinalê ez im
Zar zar dikalê ez im
Harot di çalê ez im
Marot di çalê ez im
Dûr ji wî sarê ez im
Yar di xeyalê ez im
Min dî ku derman tu yî
Milhema derdan tu yî
Li baxî werdan tu yî
Nûra li perdan tu yî
Îsa li erdan tu yî
Bi girt û berdan tu yî
Li baxê bilbil ez im
Muqîmê dilkul ez im
Bi ahê xulxul ez im
Ê xem lê nazil ez im
Qalibê bêdil ez im
Sotiyê sexil ez im
Horiya Rehman tu yî
Mohra Silêman tu yî
Zemanê Îsa tu yî
Min dikî derman tu yî
Xweş dikî derdan tu yî
Bi ah û kovan tu yî
Ê tu hubandî ez im
Hubbê kewandî ez im
Işqê şewandî ez im
Şewqê rewandî ez im
Dilê herşandî ez im
Luma lumandî ez im
Dermanê jaran tu yî
Hîva li çardan tu yî
Sêva li daran tu yî
Gula biharan tu yî
Tîlîyê nûbaran tu yî
Xutba l'mihdaran tu yî
Ê xerq di xwînê ez im
kuştîyê birînê ez im
Ê dûr ji jînê ez im
Aşiq bi bînê ez im
Wekî di şînê ez im
Xerîq ji şînê ez im
Mehbûba pirnaz tu yî
Rinda xweşrimbaz tu yî
Qewî li dilxwaz tu yî
Ereba dilbaz tu yî
Gerden di sê gaz tu yî
Ya b'tûq û gulwaz tu yî
Ê malikwêran ez im
Hewceyê xêran ez im
Dînê di dêran ez im
Mehrûm ji sêran ez im
Sermestê hêran ez im
Kuştî bi kêran ez im
Ya qenc li dinya tu yî
Ya l'ber kahnîya tu yî
Xutba enbiya tu yî
Nûra rohniya tu yî
Mehbûba dila tu yî
Nûra zimnîya tu yî
Aşiqê nûrê ez im
Mûsa yê torê ez im
Wekî di gorê ez im
Kela difûrê ez im
Dûr ji hizûrê ez im
Dara tenûrê ez im
Mihra frengî tu yî
Sultanê zengî tu yî
Ê şahê rengî tu yî
Ya b'keyf û dengî tu yî
Tîra xedengî tu yî
Kevanê bengî tu yî
Ê ku dikari ez im
Qewî nikarî ez im
Temîmê Darî ez im
Dîwanfişari ez im
Bi ah û zarî ez im
Ê tîr lê barî ez im
Min ah û medded tu yî
Yûsifê emred tu yî
Mehbûba bêhed tu yî
Dir û Zeberced tu yî
Reyhana eswed tu yî
Min can û cesed tu yî
Nesaxê bêjan ez im
Taziyê 'uryan ez im
Ê b'kul û derdan ez im
Mecrûh ji qehran ez im
Ê xurî şêran ez im
Feqîhê Teyran ez im