Ev nezm(i) tecwîdê me îmla kir ji bo etfalê pak
Da ew bixwunin her zeman ezmanê wan carî bibî”
Di warê olnasîyê de, di beşê xweşxwendina Quranê de, cara yekem Seyda Mela Xelîlê Sêrtî nivîsandibû, zatê duyemîn rêwîyê vê rêyê, zanayê ilmê ku wacib e mirov hîn bike Seyda Licêyî ye. Ev kitêb rexneyên ku bi salan e dirêjî medreseyên Kurdan dihatin kirin, Seyda bi zimanekî fesîh û rewneq wan ji meydanê rakiriye. Li ba rewşenbîrên Kurd her tim xwendevanên zarok li ber çavan bûne, çi ku ev berhem bi xwe jî ji bona sebîyan hatiye hûnandin û şirovekirin.
Her çi qas Seyda bi zimanê zarokan jî telqîn kiribe, lê di eynî demê de hewcedarîya hemû biçûk û mezinê Kurdan ên dîndar pê heye. Şagirdê nû dest bi xwendina Quranê dikin lazim e ku van meseleyên tecwîdê baş binase. Ji lew re bi van mijaran Quran xweş û rindtir dibe. Hemû suxte û feqîyên nûhatî divê ji dêvla kitêbên Erebî û Tirkî bi vê kitêba şîrîn a Kurdî bixwînin û ezber bikin.
