Gecəyarı Ağsu rayon ərazisindəki çöllükdə, qorxulu bataqlığın kənarında qədim rituala uyğun törədilmiş dəhşətli qətl bir anda Azərbaycanın bütün hüquq-mühafizə orqanlarını hərəkətə gətirir.
Bu vahiməli qətlin istintaqı Respublika Baş Prokurorluğunda aparılır. Lakin, Milli Təhlükəsizlik və Daxili İşlər nazirliyinin Əməkdaşları da bu işə cəlb olunurlar. İstintaqın ilk vəzifəsi bu qeyri adi qətlin dəhşətlərini gizli saxlamaq idi.
İstintaqa birbaşa rəhbərlik edən Respublika Prokurorluğu Ağır İşlər Üzrə İstintaq İdarəsinin rəisi polkovnik İlyas Ocaqov və bu işə cəlb olunmuş bütün komanda nə qədər çalışsalar da, bu amansız qətli törətmiş iblisin izinə düşə bilmirlər.
Psixoloq-kriminalistlər bəzi şahidlərin söylədikləri və hadisənin Ümumi mənzərəsi əsasında qatilin fotorobotunu və onun daxili aleminin psixoloji portretini çox ustalıqla yaratsalar da, yenə iblisin arxasında gizləndiyi dağın hansı olmasını müəyyən etmək müşkülə çevrilir.
Polkovnik Ocaqovu isə lap əvvəldən bir sual düşündürürdü; “Axı nə səbəbdən məhz burada…?”