Bir nəfəsdə oxuna bilən və çox təsirləndirən kitablardan biri idi. Kədərli, ürəkağrıdıcı, ağlamamaq mümkün deyil.
Maraqlıdır, yazıçılar yaşamadıqları hadisələri, hissləri, duyğuları necə möhtəşəm təsvir edə bilirlər? Əsərdə edam məhbusunun son günləri onun öz dilindən təsvir olunur. Kitabda ölüm hökmü ilə bağlı iyrənc faktlar yer alıb. Ən iyrənc fakt odur ki, insanlar bu edamları acgözlük, sevinc və ehtirasla izləyirlər. Edamın ən qorxulu tərəfi edam üsulu deyil, gözləməkdir.. İlahi! insan bu həyata necə də bağlıdır.. Əsərin qəhrəmanı ölümü ağır həyatdan üstün tutsa da, ölümə yaxınlaşdıqca, ağır həyatı arzulayır.. Ağır həyat yaşamağa, bütün ağrılara dözməyə hazırdır, təki yaşasın, günəşi görsün, nəfəs alsın! Kaş ki, ölümdən qaça bilsəydi...
Edam təkcə məhbus üçün deyil, ailəsi üçün də dəhşətlidir. Əsərin ən təsirli məqamlarından biri də məhkumun qızı ilə son görüşü idi. Bu görüşün ən qorxulu nüansı atasını tanıya bilməməsi idi.
