- Canı alan da, bağışlayan da Tanrıdır.
- Tanrı, Tanrı... Bütün günahların baisi, əliqanlı varlıq.
- Əfqanlardan sonra uzun müddət mən də elə düşündüm. Sonra anladım ki, Tanrı bizə bütün günahlarımızı üstünə yıxmaq üçün lazımdır. O olmasa, mütləq başqa bir günah keçisi tapacağıq.
- Qurtar görək, - gülümsəmək istəyən Tiqranın ağzının kənarı səyridi, - bizim xalqı tarix boyu qırıblar... Zülm ediblər. Onda haradaydı sənin Tanrın? İndi də mən, mən qan tökürəm, niyə qabağımı almır?
- Yəni istəyirsən, Tanrı sənin əvəzinə qərar versin? Birini öldürmək istəyəndə əlindən tutsun? Bizim başlatdığımız müharibələri dayandırsın? Adam başı kəsən sən, günahkar Tanrı? Bu necə olur?
- Arada əlini uzadıb bizə yardım etsəydi, nə olardı? Gözümüz də orada-burada olmazdı.
- Bizi bizsiz yaradan Tanrı, bizi bizsiz xilas edə bilmir...* Bir də ki, - Abdulla Tiqranın qana bələnmiş bədəninə baxdı, - kim deyir, Tanrı zalımın cəzasını vermir? Bir az geci-tezi var.
* Blez Paskaldan sitat gətirir.