Yayda ulduzların ömrü gödəlir,
Qışda ulduzların uzanır ömrü.
Gəlir, ömrümüzün üstünə gəlir
Bu ömrü, bu günü yazanın ömrü.
Getdi yay quşunun quş yuxuları,
Gəlir qış quşunun qış yuxuları.
Gəlir daş dövrünün daş yuxuları,
Uzanır yuxunu yozanın ömrü.
Keçir çərşənbələr, cümələr keçir,
Saraylar, villalar, komalar keçir.
O dünya varmış ki, bu dünya keçir,
Qalır qazandığın cəzanın ömrü...