Arxamca kölgəm yox,
Mənimlə qol-boyun olub gecələr.
Yanıma gələndə əyri görünür
Gözümə düz yollar,
Sərrast küçələr.
Gözümdə bir ayrı quyu qaralır,
Şübhəm gizlənmişdir həmin quyuda.
Huşumu başımdan o elə alır,
Şübhəylə içirəm təmiz suyu da.
Gecələr fikrimin quraqlığında
Nədənsə,
Nədənsə, şübhəm göyərir.
Gündüzlər fikrimin yaşıllığında
Nədənsə, nədənsə
Şübhəm quruyur.
Bu səfər
Şübhəmdən mən çox razıyam,
Bir sevgi kəşf edib şübhəm mənimçin..
Bu səfər
Şübhəmdən çox narazıyam,
Şübhədən sarsılıb.
Tükənib gücüm.
Sanki kainatı təzə görürəm,
Tək-tək ulduzlara qəlpələnmişəm.
Mən bəşər olandan,
Bəşər olandan
Allahın özündən şübhələnmişəm.
Sayfa 175