Rahmet ayıdır Ramazan bî-hilâf
Nûrlu ibâdetdir o şehre muzâf
Gitdi terâvih o güzel i'tikâf
Gel kılalım firkat ile çok fezâ'
Ey Ramazan şehri seni el-veda'
Mü'min için her günü bir 'ıyd idi
Encüme kandilleri taklîd idi
Her gecesi Kadr ile temcîd idi
Gel kılalım firkat ile çok fezâ'
Ey Ramazan şehri seni el-veda'
Tutmadık orucunu bi'l-ihtirâm
Etmedik ihyâ gecesin bi'l-kıyâm
Olmadı hakkında riâyet temâm
Gel kılalım firkat ile çok fezâ'
Ey Ramazan şehri seni el-veda'
Bilmedik kadrini çıkdı o mâh
Rûz u şebi uyku ile geçdi âh
Gitdi misâfir gibi vâ-hasret âh
Gel kılalım firkat ile çok fezâ'
Ey Ramazan şehri seni el-veda'
Gitdi sıyâm ayı gel ağlayalım
Gönlümüzü pes neye bağlayalım
Seyl gibi teşyî'ine çağlayalım
Gel kılalım firkat ile çok fezâ'
Ey Ramazan şehri seni el-veda'
Hakkı nice gitdi o Kur`ân ayı
Râzı mıdır bizden o gufrân ayı
Gaflet ile geçdi çün ihsân ayı
Gel kılalım firkat ile çok fezâ'
Ey Ramazan şehri seni el-veda'