Zəmanə dəyişib, ay sənə qurban,
tərs kimi yaşın da o vaxtı deyil.
Kəsdi düz sözümü əyri gedənlər,
dava-dalaşın da o vaxtı deyil.
Yüz baş hiylə qurur, bir baş neyləsin,
dil-dodaq təpiyib, göz-qaş neyləsin.
Buna dost neyləsin, yoldaş neyləsin,
dostun-yoldaşın da o vaxtı deyil.
Nəriman, ürəyin başqadır sənin,
millət hörmətini yaşadır sənin.
Kimlər bostanına daş atır sənin,
səbr eylə, daşın da o vaxtı deyil.