Ey mâh-ı âlem sûz-ı dil benden niçin incindin âh ..
Ey şem’-i şen-efruz-ı dil benden niçin incindin âh ..
Bir kere ol mihmân bana olsun bu cân kurbân sana ..
Çeşmim sana cây-ı sarâ benden niçin incindin âh ..
Cân sensin ey cânân bana kıl nîm nîgeh sultan bana ..
Bir şeb gel ol mihmân bana benden niçin incindin âh ..
Bu igbirâr bilmem neden yüz bir günah ettimse ben ..
Sensin hatâ-bahşende sen benden niçin incindin âh ..
Bir âşık-ı zârın benim işte vefâ-dârın benim ..
Nâzendeyim yârın benim benden niçin incindin âh ..
Ben âşık-ı divâneyim âlemde bir efsâneyim ..
Sen şem’ü ben pervâneyim benden niçin incindin âh ..
Lütfun bana dil-hâh-ı nev ebrûlarındır mâh-ı nev ..
Ruhsârına cân-gâh-ı nev benden niçin incindin âh ..
~ Lütfî ~