Gerçi zencīr-i ser-i zülfüñe çoḳdur şeydā
Delü göñlüm gibi yoḳ vādi-i ġamda tenhā
Yine dīvāneligüm dutdı görüñ şeydālar
Zülfi zencīrini depretdi gibi bād-ı ṣabā
Durmadan leşker-i ġam bu dil-i vīrāna gelür
Bilmezem ḳanda ḳarār eyleye bu deñlü belā
Künc-i miḥnetde yatur ölmelü bir ḫasteyem āh
Bu belālarla eger ḳalur isem vāh baña
Gice tā ṣubḥa degin derd ile feryād itdüm
Āh u efġānum irişmedi n’idem āh saña
Ḳaldı hecr ile cehennemde Uṣūlī miskīn
Cennet-i vaṣla eger irmez ise vāveylā