Əbədi kim var ki, hamı qonaqdı
Nə həsrətə əyil, nə qəmə əyil
Nə olsun sonuncu dayanacaqdı,
Qatar axrıncı qatar ki deyil.
Demə ki, o getdi yol çəkir gözüm,
Demə ki, xoşbəxtlik geri qalandı.
Ağrı bir tərəfli olmur, əzizim,
Elə unudan da unudulandı.
Üfür ürəyinin yanğısını soyut,
Bu cavan bu gözəl ömrünə qıyma.
Onu bu gün unut lap indi unut
Bu günün işini sabaha qoyma
Güvən inadına, güvən ağlına,
Bir azca toparlan düzələcəksən.
Kürək söykəməyin nə faydası var
Ayağın torpaqdan üzüləcəksə.
Səni unudana könül bağlama
Darıxma döyəcək qapını kimsə
Gedənin dalınca baxıb ağlama
Gedənin dalınca baxıb gülümsə.
~Firdovsi Rəsul