Der-Sitâyiş-i Ali Pâşâ
Gâhî sehâb-ı seyf ki hükmün revan verir
Ezhâr-ı bâğ-ı mülke su yerine kan verir
Vermez şihâb sîne-i şeytân-ı mârda
Ol bîmi kim adûya dırahş-ı sinan verir
Baht-ı cüvâna kadd-i dütâ-yı kemân-ı saht
Ebrû-yı çîn-girifte kadar hüsn ü n verir
Gâhî ki böyle cûş u hurûş-ı sipâh-ı kîn
Pây-ı zemîne zelzele-i nâ-gehan verir
Güft ü şünûd-i düşmen içün böyle kahr-ı
Hak Gâhî kemân u hançere gûş u zeban verir
Ammâ ki sonra böyle ser-â-pâ zebân olup
Kat‘î cevâbı tîğ çü âb-ı revan verir
Ecrâm-ı çarhı serlerine teng ü târ edüp
Gürz-i geran nüzûl-i kazâdan nişan verir
Mığferlerin leb-â-leb edüp hûn-ı germ ile
Deryâ-keşân-ı nusrete rıtl-ı giran verir
Hakkâ garîb rezm-i Tehemten-pesend kim
Her rûzı yâd-ı ma'reke-i Heft-han verir
Ammâ ne gûne rezm ki yâdı zaman zaman
Cân-ı adûya lerziş-i berk-i hazan verir
Hakkâ garîb vak‘a-ı garrâ ki yazsalar
Her harfi dest-i âleme bin dâstan verir
Ammâ ne vak‘a kim dile vasf-ı bülendinin
Her lafzı neş'e-i tarab-ı câvidan verir
Ammâ ne neş'e kim eseri fikr ü zikrinin
Kalb ü lisâna hâlet-i tîğ ü sinan verir
Ammâ ne fikr ü zikr kim âgâh olanlara
Yâdı atâ-yı hâlık-ı kevn ü mekan verir
Hakkâ ki hamdi vâcib o feyyâz-ı mutlakın
Kim ni‘meti ibâdına bî-imtinan verir
Ta‘mîm edüp atiyye-i eltâfın âleme
Bir böyle pâdşâh-ı Sikender-tüvan verir
Te'yîdin eyledikde irâdet o şâha da
Bir böyle şîr-i nerre-i gitî-sitan verir
Düstûr-ı Cem-şükûh ki mencuk-ı râyeti
Rûy-ı zemîne kevkebe-i âsman verir
Sadr-ı güzin ki gâşiyedârânı mevkibi
Dehre gınâ-yı şevket-i Sâsâniyan verir
Hem-nâm-ı Murtazâ Ali Pâşâ ki rûz-ı rezm
Şemşîri Zü'l-fikâr-ı Aliden nişan verir
Şîr-i cihan- güşây ki çengal-ı satveti
Sîmurg-ı Kafa tefrîka-ı âşiyan verir
Simurg-ı ejder-efken ü şîr-i sipeh-şiken
Kim kûh-ı Kâf hamlesini görse yan verir
Tertîb-i mevkib etse ağâyân-ı hâsına
Şemşiri mâh-ı nev kemeri kehkeşan verir
Ecrâm-ı çarha nîzesi isbât-ı hark eder
Tîği delil-i cevher-i ferde zebân verir
Nahcîre çıksa satveti her nîm hatvede
Dest-i kemende bir iki şîr-i jiyan verir
İmdâd-ı âcizânı murâd etse kudreti
Tasvîr-i mûra heybet-i pil-i deman verir
Kim reşha-i inâyeti ummâna haşre dek
Tab‘-ı hurûş u cûş-ı miyân u keran verir
Bir gûşe-i nigeh ile mi‘mâr-ı himmeti
Sûrâh-ı mûra vüs‘at-ı kevn ü mekan verir
Bir bî-nevâya bir nigeh-i iltifât ile
Cemşîd ü Keykubâd kadar hânuman verir
İsterse feyz-i ebr-i bahâr-ı mürüvveti
Bir çûb-ı huşke cünbiş-i serv-i çeman verir
Efkârının bedîhesini akl-ı âşire
Kilk-i kazâ yazup sebak-ı imtihan verir
Mülk-i yakîne azm eden efkâr-ı sâibe
Re'y-i münîri meş‘ale-i kârban verir
Gül nahl-i çâr-bâğ-ı mekârim ki bir gülün
Gâfil sekiz behişte veren râyegan verir
Bahşende-i yegâne ki bir mûrun istese
Dest ü diline havsala-ı bahr u kân verir
Ey saf-der-i cihan ki felek rahş-ı azmine
Mehden rikâb ü berk-ı cehandan inan verir
Ammâ ne rahş rahş-ı tırâzende-tarz kim
Na‘lin hilâl mîhın ise ahteran verir
Kopsa yerinden irmek içün gerd-i râhına
Vehm ü hayâle bahs ile bin yıl zaman verir
İklîm-i Rûma istese bir demde râkibi
Ahbâr-ı Çîn ü Tübbet ü Hindûstan verir
Şâhîn-i saht-ı pençe-i bâzû-yı kahrının
Her rûz ta‘masın ciger-i Kahraman verir
Bir kerre tîğin üzre konan peşşe-i nahîf
Dehre peyâm-ı satvet-i Cengiz Han verir
Bir kez zih-ı kemânın öpen tîr-i mürde
Tâ haşr vahşe râtibe-i kût-ı can verir
Vermek kef-i felekde meh-i nev ne ihtimâl
Destinde ol fürûğı ki tûz-ı keman verir
Devrin bu feyz-i neş'e-i câm-ı neşât ile
Zâl-ı sipihre revnak-ı ömr-i cüvan verir
Âhir bu iktidâr ile pâs-ı mehâbetin
Çengâl-ı kürke kisvet-i çûb-ı şeban verir
Hâk-i der-i refî‘in ile etse iktihâl
Çeşmân-ı mûra şa‘şa‘a-ı ferkadan verir
Gâhî ki cûş-ı ma‘ni-i rengîn-i midhatin
Dest-i hayâle zîb-i gül ü gülsitan verir
Fi'l-hâl berk u şâh salup gülbün-i kalem
Bir böyle dil-güşâ gazel-i gül-feşan verir
Bûs-ı lebin piyâleye rûh-ı revan verir
Feyz-i tebessümün gül-i tasvîre can verir
Bir tâb verdi kaşlarına senin vesme kim
Ancak o tâbı deşneye seng-i fesan verir
Aks etdi sanma sînesi sâki nişân içün
Rez duhterine bir gümüş âyînedan verir
Sen eyledikçe kasd-ı tegâfül o çeşm-i mest
Her bir nigâh-ı şûhuna yüz bin zeban verir
Bâzû-yı dâğdânnı seyr et o âfetin
Şâh-ı semen aceb ki gül-i erguvan verir
Âb-ı hayâta nâz ile çîn-i cebin satan
Can nakdini visâlin içün şâdman verir
Ey sadr-ı muhterem ki mezâyâsı vasfının
Her beyte zîb-i mesned-i Nûşîrevan verir
Sana bu izz ü câhı veren mülk-i nazmda
Devrinde bir benim gibi sâhib-kıran verir
Tab‘ım o bâğ-bân-ı giran-dest-mâyedir
Kim bir gül istesem bana bir gülsitan verir
Her harf-i şûhu bülbül-i şeydâya nazmımın
Bir gülsitan tebessüm-i gül armağan verir
Her kâle-i müzerkeşi nessâc-ı tab‘ımın
Şehbender-i belâğata zîb-i dükan verir
Tertîb-bend-i zîc-i hayâlim çeh-i devât
Bana kifâyet-i rasad-ı İlhan verir
Encüm değil felekde kazâ bikr-i fikrime
Her şeb hediyye bir tutuk-ı zer-nişan verir
Nazmım görünce rûh-ı Zâhir ü Senâyîye
Peyk-i neşât müjde-i râhat-resan verir
Nefî dahı ademde işitdikçe sözlerim
Şâbâş u âferîni cihan-der-cihan verir
Ammâ hemîşe baht-ı dağal-bâz neyleyim
Tab‘-ı bülendime halecân-ı nihan verir
Ağyâra câm sunsa sipihr-i sitîzekâr
Ben zâra âb-ı tîğ-ı gam-ı hun-çekan verir
Yahşı sayan yamana bu devr-i zamâneyi
Yahşı bilir ki yahşıya dâ'im yaman verir
Billah koyma bildiğin elden felek hemân
Bir gün senin de lâyıkın âh u figan verir
Sen şöyle bil ki cûşiş-i deryâ-yı ıztırâb
Cân-ı hamûle lenger-i kûh-ı giran verir
Geldikçe ceyş-i derd-i şehenşâh-ı himmetim
Sabra esâs-ı kal‘a-i Mâzenderan verir
Şekvâyı koy Nedîm ki elbet bu rûzgâr
Eşkeste fülk-i kâmına bir bâdban verir
Bir dem gelür ki lutf-ı revan-bahş-ı âsafî
Dilde hezâr mürde-i ümmîde can verir
Va‘d-i kerîmin eyleyüp incâz âkıbet
Me'mûl odur ki matlabını râyegan verir
Sen gayri destin aç yürü bir âstâna kim
Şâh u gedâya matlabı ol âstan verir
Tâ hükm-i ism-i pâk-i Mu‘izz ü Müzil müdâm
İmân ü küfre hâlet-i mâh u ketan verir
Tâ kim hemîşe şu‘le-i şemşîr-i âbdâr
Hâşâk-ı bağye sûziş-i berk-ı cehan verir
Hem-vâre pâydâr ola ey sadr-ı kâmkâr
Zâtın ki sadr-ı ma‘delete izz ü şan verir
Dûr olmasın elinden o tîğ-i cihan-güşây
Kim ferr ü tâbı âleme emn ü aman verir
Olsun ser-i benânına münkâd o hâme kim
Her harfi mülke dâd-ı Unûşîrevan verir
- Nedim -
·
70 görüntüleme
Yorum yapabilmeniz için giriş yapmanız gerekmektedir.