Babəkin rəhbərliyi altında 816-837-ci illərdə Azərbaycanda alovlanan azadlıq hərəkatı hələ müasirlərinin, habelə orta əsrlərin bir sıra tarixçilərinin nəzər-diqqətini cəlb etmiş, onlardan bir çoxu bu şöhrətli xalq sərkərdəsi haqqında maraqlı xatirələr və təsvirlər, VIII əsrin sonları – IX əsrin əvvəllərində Azərbaycanda xürrəmilər adı ilə genişlənmiş olan xalq azadlıq hərəkatının tarixinə dair qiymətli məlumatlar vermişlər. Sonrakı dövrlərdə də Avropa, rus və Şərq müəllifləri Babək hərəkatı ilə maraqlanmış, Babək və onun rəhbərlik etdiyi hərəkat haqqında yazmışlar. Belə əsərlərdən biri də yazıçı-tarixçi Səid Nəfisinin “Azərbaycan qəhrəmanı Babək Xürrəmdin” əsəridir.
