Viktor Frankl (1905-1997) psixologiya tarixində loqoterapiyanın banisi kimi tanınan avstriyalı psixiatrdır. Frankl 1942-ci ildə nasistlər tərəfindən əsir götürülərək ölüm düşərgəsinə göndərilir və 1945-ci ilə kimi müxtəlif əsir düşərgələrində yaşamaq uğrunda mübarizə aparıb, həyatda qalmağa çalışır. Bu kitabı da azadlığa çıxdıqdan sonra qələmə alır. Məqsədinin əsir götürülmüş şəxslərin başına gətirilən dəhşətləri əks etdirmək deyil, onların psixoloji vəziyyətini təhlil etmək olduğunu söyləsə də, bundan qaça bilməmişdir.
Viktor Frankl həyatın bir mənası olduğunu və bu mənanı tapan şəxsin bütün iztirablara qatlaşa biləcəyini vurğulayır. Lakin onun nəzərdə tutduğu məna individual xarakter daşıyır. Qurduğu və "üçüncü Vyana psixologiya məktəbi" adı ilə tanınan loqoterapiya (logos- məna) da bu düşüncəyə əsaslanır.
"Həyata Hə demək" kitabında məhbusların psixoloji vəziyyətinin dəyişilməsi düşərgəyə gəlmə, düşərgədə həyat və azad olunma fazalarına bölünərək ələ alınıb. Məhbusların getdikcə necə ümidlərini itirdiklərini, laqeydləşdiklərini, nəzarətçilərin isə necə insanlıqlarını itirdiklərini bu fazalarla izləyirik. Franklın heyranlıq doğuran cəhəti isə bütün bu dəhşətlər içərisində ümidini itirməmiş insanların və insanlığını itirməmiş nəzarətçilərin mövcudluğunu duyması və onlara köklənməsidir.
Müəllif kitabda həyatın mənası ilə yanaşı, azadlıq, nifrət, siyasət, din, incəsənət, fəlsəfə və bir çox müxtəlif mövzulara da toxunur.
