"Müəllim bir şama bənzər, özünü əridərək başqalarına işıq verər." (M.K.Atatürk)
Grigory Petrovun bu əsərindəki müəllim obrazı-Raçinski bu sözlə necə də bütünləşir…Kitabda sözün əsl mənasında ideal müəllim obrazı ilə qarşılaşırıq.
Rusiyanın tanınmış botanik-riyaziyyatçısı Sergey Raçinski ölkəsindəki problemləri həll etmək ümidi ilə çətin bir qərar qəbul edir.Rusiyanın elmi-texniki sahədə inkişafdan geri qalması,əyalətlərdəki cahillik,savadsızlıq onu bu problemləri analiz və həll etməyə sövq edir.Bir ziyalı kimi düşünür və universitetdəki işindən istefa verərək,öz doğulduğu kəndə-Tatevoya qayıdır və istedadlı şagirdləri kəşf edir,onların həyatlarına toxunur.Raçinski öz amalını belə izah edir:
"Kömür,duz,dəmir öz-özünə yerin üstünə çıxa bilməz.İnsan yeri qazaraq onu üzə çıxara bilər.Bunun üçün mən də xalqımızın ağıl və vicdanında basdırılmış və gizli qalan qiymətli cəvahirləri ortaya çıxarmaq üçün doğulduğum kəndə gedirəm."
Kitabın kiçik həcmli olmasına baxmayaraq ,1800-cü illər Rusiyası güclü analiz edilib.Rus xalqının içkiyə,əyləncəyə olan meylləri və bunun altında yatan səbəblər,eyni zamanda həll yolunun yalnız təhsildə,özünü inkişaf etdirməkdə və fədakarlıqda olduğu qeyd edilir.
Təhsil sahəsində çalışan,peşəsini sevən və hörmət edən hər bir müəllimə,həmçinin uşaq yetişdirən hər bir valideynə oxumağı tövsiyə edirəm.