Bəlkə min il qabaq səhv düşüb nəsə
Min illik bir səhvə qurban getmişik...
Alın yazımızdı, belə yazılıbmış. Yazıya pozu yoxdu.
Daşların üstündə də qalmalıymış.
Tələsdiklərindənmi belə olub, gecikdiklərindənmi? Gələcək qədər uzaq olan bir keçmişin işləridi...
- Su axdığı yerdən bir də axar, - dedi. - Biz də axdıq, axarımızı tapdıq. Yeddinci dədəm bu yerlərin adını çəkərmiş. Babam öləndə deyib, bizlərdən kimsə gedib o yerlərdə öləcək. Mənəm, ölməyə gəldim, torpaq çəkirmiş məni.
Hamı yuxudan oyanmışdı. Yuxusunda qismət görən qalxıb bazarlığa gedirdi, su görən təzə iş başlayırdı... Yol görən gedənini gözləyirdi, qan görən qovuşuq gözləyirdi...