Müasir dövrün insanlarının ən böyük problemlərindən biri də mənəvi boşluqdur. Vücudunun maddi ehtiyaclarını mütəmadi şəkildə təmin edən, mənəvi ehtiyaclarına isə əhəmiyyət verməyən bəşər övladı bu boşluğu doldurmaq üçün bir çox hallarda yanlış yollara baş vurur, zərərli vərdişlərə qurşanır. İnsanın bu ruhi-mənəvi aclığını yanlış yerlərdə doyurmağa çalışması da bəzən intiharla nəticələnir. Qəlbin mənəvi boşluğunu dolduran, ona həyat verən yeganə iksir məhz imandır. İnsan imanla könül toxluğuna nail olur və riza məqamına yüksəldikcə, yəni Allahın razı olacağı səviyyədə ibadət etdikcə əsl xoşbəxtliyə və söz qəlibinə sığmayan mənəvi həzlərə çatır.