"Ölümünə bir neçə addım qalmış gəncin içində geri çevrilib səmanı, ağacları, qarı, müharibələrin məhv etdiyi bu dünyanı bir də seyr etmək arzusu baş qaldırdı. Hələ onun həyatında geri dönüb baxacağı heç nəyi, heç kimi yox idi. O özündən sonra qoya biləcəyi heç nə yaşamamışdı. Bütün həyatı hələ qabaqda idi. İndi isə ondan qabaqda, bir neçə addım irəlidə neçə-neçə gəncin son ünvanı olan qanlı divar var idi."