1 Dilim sahrâsına otagını kurdurdı gam saf saf
Yine ceng ü cidâle başladı derd ü elem saf saf
2 Derûn-ı derdimin şerhin degil kâbil kılanı takrîr
Sana bir bir hisâb ile gözüm döksün rakam saf saf
3 Ne çâre yandı cânım sûz-ı 'aşkından nedir tedbîr
Kabûl itmez devâ toptolu bu bagrım verem saf saf
4 Fürû-ser eylemişler bunca 'âşık bende sultânım
Der-i lutfunda ser-gerdân umar cûd u kerem saf saf
5 Kurulsun bezm-i 'işret meclis-i zühdî harâb olsun
O meh-veş sâkîler sunsun şarâb-ı câm-ı Cem saf saf
6 Görüp üftâdelerin nûr-ı cemâlin kaş-ı mihrâbın
Didi Allâhu ekber cümle kıldı re'si ham saf saf
7 Olupdur fethi müşkil bir hisâr etrâf-ı Rûhî'ye
Rakîb-i nâ-sezâlar atdıgı seng-i sitem saf saf
1 Bezminizde bilmezem ki mey mi yok mey-hor mı yok
Mest la'l-i lebleri meh-pâreden mahmûr mı yok
2 Gamze-i hûn-hâr elinden görmedim üftâde hiç
Cezbe-i hûb-rû mı yok hûbîlere mecbûr mı yok
3 Şevk u zevk ister nişân-ı ehl-i diller bezmine
Âşinâ-yı mûsikî ney-zen mi yok tanbûr mı yok
4 Meclis-i ehl-i mahabbetde bu etvârın n'ola
Sa'd-sîm sâkî mi yok yâhûd mey-i engûr mı yok
5 Şu'Ie-i şem'i mahabbetler neden bulmuş küsûf
Yoksa baht-ı kevkeb[i] dillerde zerre nûr mı yok
6 Bunca var meh-rû cihân-ârâ müselsel kâküli
Cân virüp her mûyına ber-dâr olan Mansûr mı yok
7 Bilmezem bulmuş neden bâzâr-ı şi'r ehl-i kesâd
Sûk-ı 'aşk içre 'aceb Rûhî gibi meşhûr mı yok
1 Felek hâlim mükedder eyledin cevr ü cefâdan geç
Yeter bîhûde ben za'îf ile gel iddi'âdan geç
2 Tavîl-i 'ömr olursam Nûh gibi mahbûbdan el çekmem
Gel ey nâsıh bana kâr eylemez pend ü recâdan geç
3 Döker hûn-[âb] gözüm bagrım yanar leyl ü nehâr her dem
Yol ugrat bir seher gör hâlimi mihnet-serâdan geç
4 Girüp kana kul öldürmek degildir şânına lâyık
Bagışla cürmümi 'afv it kerem kıl bu hatâdan geç
5 Beni alma ayaga nâzenînim güft-i ağyârla
Sana dirse o dûn-ı bed-likâ Rûhî gedâdan geç