Ailəsi ilə sivilizasiyadan .ox uzaqda yaşayan, məktəb üzü görməyən, dolanışıq üçün dəmir-dümür yığan mövhumatçı atasına, qardaşlarına, türkəçarəçi anasına kömək edən, doğum haqda şəhadətnaməsi belə olmayan, kitab dəftərdən uzaq bir qızın sonradan Harvardda, Kembricdə təhsil alması, alim olması haqda roman oxumaq maraqlı olardı, düzdürmü? Amma bu, roman deyil, Tara Uestoverin roman dadı verən memuarlarıdır. Yazılanlar həqiqətdir. Belə bir qadın, doğrudan da, var. “Tələbə” ilhamverici bir kitabdır. İnsanın özünü yaratması, böyüməsi, daxili gücün, inamın, hər şeyə rəğmən mübarizə aparmağın, sınmamağın əhəmiyyəti haqda bir kitab... Ancaq bu əsərin qaranlıq tərəfləri də var. Oxuduğumuz zaman bəzən ürəyimiz ağrıyacaq, qəzəblənəcəyik, hətta özümüzdən çıxacağıq; zorakılıq, mövhumat bizi qeyzləndirəcək; insani münasibətlərin dolaşıqlığı, nəql olunan hadisələr bizi şaşırdacaq. Bununla belə, bu kitabı oxuyandan sonra az da olsa dəyişəcək, ya da dəyişməyə qərar verəcəyik...
