Əli Rzazadə 23 may 1981-ci ildə Masallı rayonunda dünyaya göz açmışdır. Uşaq yaşlarından şərq mədəniyyəti ilə maraqlanan Əli Rzazadə şərşünaslıq fakültəsinə daxil olmuş və universiteti fərqlənmə diplomu ilə bitirmişdir. Daha sonra isə təhsilini Misirin Cənub Vadi Universitetində davam etdirmişdir. İxtisasca şərq dilləri üzrə mütəxəssis, tərcüməçi və ilahiyyatçıdır. Bir çox beynəlxalq konfrans və tədbirlərdə iştirak etmişdir. Ərəb ölkələrinin dövrü mətbuatında məqalələri və müsahibələri dərc olunmuşdur. Ərəb və fars dillərindən bir çox tərcümələri vardır. Əli Rzazadə ilk dəfə Qarabağ həqiqətlərini xüsusilə Xocalı faciəsini əks etdirən ərəbcə kitab yazmış, kitab bir neçə ərəb ölkəsində oxucu auditoriyasına təqdim edilmişdir. Bununla yanaşı “Yağış”, “Sonsuz”, “Nurdan Zərrələr”, “Mənəvi Dəyərlər və Ətraf Mühitin Mühafizəsi”, “Səmaya Qayıdan Yazı”, “Onun Hekayəsi” adlı əsərlərin müəllifidir.
Əli Rzazadə hal-hazırda Sumqayıt Dövlət Universitetində öz pedaqoji fəaliyyətini davam etdirir.