Ölmədən öncə belə bir romanla qarşılaşdığıma görə özümü şanslı hesab edir, belə bir əsər ərsəyə gətirdiyinə görə isə yazara öz dərin minnətdarlığımı bildirirəm.Romanda bir çox dərin mövzulara toxunulmuşdur.Sevgi, ailə bağları, səbr, dözüm, müharibə, çarəsizlik, nifrət , ümidsizlik və s.
Belə bir söz vardır: Səbr məcburiyyətdən öyrənilməz.İnsan məcbur olduğu şeylərə səbr etməz, dözmək məcburiyyətində qalar.Bir də var VƏFA. Səbr və dözümün bir sonu vardır, amma Vəfa bir ömür sürər.
Əsəri oxuduqca məsum xalqın dözümünə, Adriananın səbrinə və Əminin vəfasına heyran qalmamaq mümkün deyildir.
Kitabın sonunda da deyildiyi kimi əsər həqiqi Sevginin dünyada hər şeydən üstün olduğuna və bütün çətinliklərə qalib gələcəyinə inanan insanlar üçün yazılmışdır.Kitabı bitirəndən sonra inanmayanlarında inanacağına ümid edirəm.
Bundan əlavə düşünürəm ki, psixologiya ilə maraqlananlar üçün də əla bir vəsaitdir.Romanda insanın psixoloji durumları, düşüncələri, bu psixotik durumlarda verdiyi qərarlar gözəl bir hekayəyə bürünmüş şəkildə oxucuya təqdim olunmuşdur.İnsanın "ideal obraz"ının əlindən alınması zamanı düşdüyü durum, keçmişdən qopmamaq, bu durumların özü ilə gətirdiyi ümidsizlik, qorxu, "bir gün istədiklərimə çatacam" ümidilə özünə məxsus olan həyata sahiblənməməsi kimi bir çox mövzuları araşdırır.
Bu kitab hər kəsin oxuduğu zaman özündən bir parça tapacağı, eyni zamanda özü ilə bir ömür öyrənib nəsə aparacağı həyat dərsləri ilə doludur.