Əslən Azərbaycanın Sabirabad şəhərindən olan,Bahar xanım İntellekt liseyində təhsil alıb.Yazmağa uşaq yaşlarından həvəs göstərib. Kiçik hekayələr və şeirlər müəllifidir.
Ana, vallah, tükənmişəm, yaşayan sadəcə cismimdir, ruhum çoxdan ölüb.
– Qızım, İlqar axı səni sevir. Sənə hər şey alır, evinə, ailəsinə qarşı diqqətlidir.
Ac-susuz qoymur ki... Həm də fikir vermişəm, səni də gözünün üstündə saxlayır.
– İlqar, doğrudan da, peşəkar duyğu qatildir... Ruhumu öldürsə də, heç bir iz buraxmayıb.
– Qızım, İlqar səni döyür?
– Yox.
– Söyür?
– Yox.
– Ac saxlayır?
– Yox.
– Bəs niyə xırda məsələləri şişirirsən?!
Qızım, hər xırda məsələyə görə ailə dağıtmaq olmaz. Atan xəbər tutsa, ürəyi dözməz.
Bilirsən ki, yazığın ürəyi xəstədir. Həm də bizim nəsildə boşanma söhbəti olmayıb.