Yaxşı ki, dünyada yaşayıram mən,
Bir insan adını geyib əynimə,
Bir insan ömrünü alıb çiynimə,
Günlərdən-günlərə daşıyıram mən.
Heç mən olmasam da dünya olardı,
İnsanlar, qayğılar yenə vardılar.
Dünya bir ürəklik kasıblayardı,
Dostlar bir dost boyu qısalardılar.
Heç mən olmasam da, boş qalmaz yerim,
Min Fikrət tapılar tanışa, yada.
Mənim öz sevincim, mənim kədərim
Yetim qalacaqdı gözəl dünyada.
Mənim məhəbbətim bahar kimidir,
Nifrətim ən qəddar şaxta, ayazdı.
Bütün qapıları döyərdi bir-bir
Gecələr yatmağa sizi qoymazdı.
Yarımçıq iş
Nişanlı qalan oğuldu, qızdı.
Yarımçıq iş
Barsız gələn payızdı.
Yarımçıq iş
Körpüsü tikilməyən yoldu.
Yolu olmayan eldi.
Sözü olmayan dildi.
Yarımçıq iş
Məqsədsiz işdi,
Mətləbsiz söyüşdü,
Məhəbbətsiz öpüşdü.
Yarımçıq iş
Tavansız damdı.
Göydən düşən
Evinə damdı.
Qardaş, xülasə
Yarımçıq iş
Yarımçıq adamdı.
Sevgimdən qaçmışam uzaq şəhərə,
Burda da həsrətin gəlib dayanıb.
Ətrin səpilibdir bütün güllərə,
Gözünün rənginə göylər boyanıb.
Səninçün dünyada bəlkə yoxam mən,
Səni sevdiyimi heç bilməyirsən.
Gündüz xəyalımdan, gecə yuxumdan,
Bir an da, bir an da çəkilməyirsən.
Ürəyim, daşa dön, bu sirri saxla!
Bu sevgi, bu bəla hardan enibdi.
Bizim taleyimiz evlə, uşaqla
Hərəsi bir yana zəncirlənibdi...
Ölüncə eşqinlə olacağam mən,
Mən sənin ruhunda, qanında varam.
Üstünü kül örtmüş bir ocağam mən,
Balaca bir mehdən qaynayar yaram.
Məhəbbət süzülür
torpağa-daşa
Çaylar süd rənginə
Boyanıb gedir.
Bu ay işığından,
Bu məhəbbətdən
Dağlar ağır ağır
ayağa qalxır.
Bulağın sevgisi
Gözündən axır.
Zirvələr az qalır göyə dırmaşa
Ürəyim partlayır məhəbbətimdən
bu yaz gecəsində,
ay işığında,
Yolun ortasında,
Göz qabağında
az qalır ağactək,
pöhrəliyim mən.
Ürək doğuldu,
böyüdü, yaşa doldu,
İnfarkt oldu.
Yüz yana yozdular səbəbini,
Axtardılar çarəsini də.
Əsl səbəbi
ani intizar idi
"hə" ilə "yox" arasında.