Bilmirəm nə vaxt, haçan
Cənnətdən bezib qaçan
Bir mələksən, gözəl qız.
Mənim yolumu kəsən
Bir fələksən, gözəl qız.
Bu yayın istisində
Gözlərin nə sərindi,
Gözlərin nə sakitdi,
Getdikcə ağlım gedir,
Gözlərin nə dərindi.
Məni hara aparır
Gözlərinin ovsunu.
Getdikcə yaxınlaşır
Azadlığımın sonu.
Gözlərindir kainat;
Hər halda mənim üçün,
Orda başlayır həyat,
Orda qurtarır həyat.
Mənə elə gəlir ki,
Gözlərindi qoruyan
Düyanın ahəngini.
Gözlərində yaşadım,
Amma görə bilmədim
Gözlərinin rəngini.