"Bu sosial şəbəkələr də insanların həyatına əməlli-başlı daxil olub ayrılmaz bir parçasına çevrilmişdi. Məktəblidən tutmuş professora, iş adamlarından tutmuş fəhləyə kimi hər kəs bu şəbəkələrdə otururdu. Hamının bir neçə şəbəkədə öz şəxsi hesabı var idi. Əvvəllər avtobuslarda, metrolarda kitab oxuyan insanlara rast gəlinirdisə, indi onların əllərindəki kitabları bahalı telefonlar əvəz etmişdi. Bu şəbəkələr, əslində, özləri də bilmədən onları öz əsirinə çevirirdi. Nə isə..."
"Real həyatdakı ölülər isə sosial şəbəkələrdə yaşayan, bir dəqiqə də olsun başını virtuallıqdan ayıra bilməyən varlıqlar idilər. Onları gəzən ölülər də adlandırmaq olardı"
"...Əyilərək divar tərəfdən çətinliklə bıçağın sancıldığı yerə baxdı. Buradan axan qan, artıq qurumaq üzrə idi. Əlləri yanına düşmüş kişini bütünlüklə, başdan-ayağa süzdü. Sonra sol tərəfinə keçdi. Sol tərəfdə döşəmənin üstündə kiçik bir qan gölməçəsi əmələ gəlmişdi. Bu gölməçəni kişinin boynundan çiyninə tökülərək oradan da döşəməyə axan qan yaratmışdı. Ayağa qalxdığında mayor onun simasındakı güclə sezilən incə təbəssümü görə bilməmişdi.
Yenidən qadına yaxınlaşdı. İndi isə çarpayını iti baxışları ilə nəzərdən keçirirdi, sanki nə isə axtarırdı. Çarpayının üstündəki adyal səliqə ilə sərilmişdi. Bircə, qapı tərəfdən aşağı hissəsi bir qədər dağılmışdı. Yəqin ki, qadın çarpayının üstünə yıxılarkən adyalı uçurmuşdu. Baratın bu hissəyə xüsusi diqqət yetirdiyini görən Əşrəf nə qədər baxsa da, birşey anlaya bilmədi..."
İblisdən BetərPerviz Elyaroğlu · Xan Nəşriyyatı · 021 okunma