Olsun bu gün sürür ile pîrâye kâinât
Dolsun bu gün hubûr-ı saâdetle şeş cihat
Zira bu günde verdi o şâh-î melek-sıfat
Rûh-î fütûh-ı saltanata tâze bir hayat
Ya Rabbi haşre dek yaşasın pâdişâhımız.
Nâm-î celîli <Hazret-i Abdü'l-Hamid Han>
Devrinde kıldı ümmeti mesrûr ü şadman
Asrında kıldı milleti mesûd u kamran
Evreng-i saltanatta ile'l-âhirü'z-zaman,
İclâl ü şân ile yaşasın pâdişâhımız.
Ol şâh-ı bi-misâl-i Hamid hasletin ki biz,
Devrinde bunca nîmet-i uzmâya nâiliz
Zir-î himâyesinde refâh eylemekdeyiz,
Dergâh-ı Hakk'a arz-ı münâcât eyleriz
Etsin şükûh u şevket ü ikbâlini müdam.
Åbâd kıldı âtifeti mülk ü devleti,
Dilşâd etti merhameti kalb-i ümmeti
Gösterdi zâtı âleme şân-î celâleti
Yâ Rabbi sen o zîver-i tâc-î hilâfeti
Åsâr-ı bî-şumârî ile eyle berdevâm.
Vardır yeri kıyamete dek etsek iftihâr,
Zirâ bize o Hâlık-ı vehhâb-ı girdigar,
Bahşetti böyle bir şeh-i âlî-i lûtufkâr
Fahreylesin anınla selâtin-i rûzigâr,
Şâhenşehân-ı âlem içinde yegânedir.
Müstağrak-ı mekârım olup serteser cihan
Mülkünde verdi her yere umrândan nişan,
Oldu ulûv-ı himmet-i âlisi râyegân,
Te'sîs olundu râh-ı Hicâz-ı şeref-resan
Ulviyyet-i kemâline bu bir nişânedir.
Eyler cihâna bezl-i kerem tab'-ı râifi,
Her sûya câri sâye-i lûtf u avâtıfı
Bil-ihtimâm eyledi ihyâ maârifi
Yâ Rabbi sen o şâh-ı keremkâr-ı ârifi
Kıl pâyidâr-ı taht-ı muâllâ-yı saltanat.
Ey şehriyâr-ı âtifet-âsâr-ı muhterem,
Ey tâcdâr-ı mâ'delet-efkâr-ı zü'l-kerem
Sensin o pâdişâh-ı dil-âgâh-ı pür-himem,
Kim vasf-ı hazretinde senin her ne söylesem
Ahrâdır ey Halife-i pür-lûtf u mâ'delet.