Doğru deyən olsaydı yalançı usanardı,
Avarə qalanlar dəxi bir söz də qanardı!
Sabitqədəm olsaydı əgər yar vəfadə,
Aşiq dəxi qaçmazdı bəladən, dayanardı!
Əqval ilə ə'mal bir olsaydı, yəqinən,
Bunca denilən sözlərə məxluq inanardı!
Münsif həqə həq, batilə batil söləsəydi,
Əlbəttə ki, nahəq söləyən şəxs utanardı!
Şəxsiyyə qərəz yatmışa laylay deməsəydi,
Qəflətdə yatan gözlərimiz bir oyanardı!
Gər ağzı küləkli kişilər pefləməsəydi,
Bir şəm'ki, asudə yanır, həm də yanardı!
Həq söyləyənin küfrünə hökm eyləməsəydik,
Həqgu məgər öz fikrini gizlərdi, danardı?!
Ey qardaşlar, bir zamanlar elmsizlik dumanı,
Cəhalətin kor pəncəsi qaplamışdı hər yanı...
"Quran" nədir? Anlamadıq,
Vətən nədir? Bilmədik!
Qarşımızda yetimlərin göz yaşını silmədik.
Ağlanacaq bir hal idi, kəndimiz də görürdük,
Dilimizin, dinimizin getməsinə gülürdük...
~