Rütbə üçün qan töküb can almaq insanlıq deyil,
Ey səfil, qarşındakı insandı, qurbanlıq deyil.
Mərifətdir Adəm oğluyçun ən üstün mərtəbə,
Əyrilik, pislik, tamahkarlıq, qudurğanlıq deyil.
Hər daşında göz yaşından iz qalan bir qəsrdə
Bir yetim malın yeyib yatmaq firavanlıq deyil.
Min qoyun qurban kəsib yüz məscid inşa eyləmək
Bir könül sındırmağı örtən peşimanlıq deyil.
Xaliqə xidmətdisə niyyət, əziz tut bəndəsin,
Allah-Allah qışqırıb gəzmək müsəlmanlıq deyil.
Bir qarişqa qədrini bilməkdi şahlıq qüdrəti,
Acizi, məzlumu məhv etmək Süleymanlıq deyil.
Hakim olsa aqilə cahil, cahan bərbad olar,
Bu cəhalət öylə bir dərddir ki dərmanlıq deyil.
Cəhd elə, Arif, düşündürsün kəlamın, yoxsa ki
Boş sözü misraya doldurmaq qəzəlxanlıq deyil.
HacıArif_Buzovnalı .