Finlandiya-bataqlıqdan ağ zanbaqlar ölkəsinə çevrilən dövlət. Kitab fin xalqının inkişaf yolunda mübarizəsini hərtərəfli əks etdirir. Sözün əsl mənasında, bəşəriyyət üçün nümunə ola biləcək bir əsərdir. Sivilizasiyadan uzaq, dövrünün bir çox dövlətləri ilə müqayisədə sosial, iqtisadi, mədəni sahədə geri qalan bir xalq belə bir inkişafa necə nail oldu? Uzun illər İsveç və Rusiya əsarətində qalaraq müstəqillik kəliməsindən bixəbər olan bir xalq üçün bu çox önəmli və təqdirəlayiq bir uğur idi. Əsərdə əsas diqqət çəkən məqam xalq içərisindən olan ziyalıların öz üzərlərinə düşən öhdəliyi dərk edib əzmkarlıqla mübarizə aparmalarıdır. Bir ovuc ziyalının fin xalqını bu bataqlıqdan çıxara bilməsi isə kənardan asan görünən, lakin güclü iradə və səbir tələb edən bir mərhələ idi. Kitab 13 hissədən ibarətdir və bu hissələr ziyalıların səyi ilə reformasiya edilən sahələrin adı ilə adlandırılır. Ailə münasibətləri, düzgün təhsil sistemi, mühüm insani keyfiyyətlər haqqında verilən mesajlar isə sadəcə alqışlanmalıdır. Hər kəsin oxumalı olduğu kitab olduğunu düşünürəm.