“Polkovnik-leytenant Vidadi Xalilova tapşırıq verilir ki, düşmənin Laçın rayonu ərazisindəki mövqelərinə yaxınlaşıb məlumat toplasın. Həmin ərazidə əsgərlərimizin pusquya düşmək ehtimalı çox böyük imiş. Bu səbəbdən əmri verən general Vidadiyə özü ilə yüzdən çox əsgər götürməsini tövsiyə edir. Lakin "pusqu təhlükəsi varsa, uşaqları özümlə aparıb orada qırdıra bilmərəm” deyən cəsur komandir kəşfiyyata yalnız bir rabitəçi ilə tək özü gedir.
Kənan əziz komandirinin həmin kəşfiyyat zamanı şəhid olduğunu deyəndə göz yaşlarına hakim ola bilməyib məni də ağlatdı…”