Gelo sax e? Gelo - mirî?
Sax bûya, Rihana pêcirî
Wê xwe kira kincê gincir,
Tenî kira dêmê xwe dur,
Û biçûya bi parsê, pirsê
Bigihîşta yêrê Qersê.
Cem zavitê serekbaşî,
Xwe bavîta dest û pîyê wî,
Bigota: "Ez bextê te me,
Ez bextreş im, ez gune me...
Merîkî min we girtî ye dîl,
Ew e, ku jê ra dibên Celil,
Pêştirî wî li vê dinê
Tunê kesê min rebenê...
Ew bêsûc e, ew bê gune...
Tî wî tevî şera tune...
Ber dewleta Alî-Osman
Nekirîye tu daw û duan...
Bidî xatirê navê Xwedê,
Ewî berde, bera ew bê,
Çika jinika xwe rûreş ra
Qe çi gilî-gotina dibê.
Lê, ax, dibên, ew kuştine.
Canîya wî ye can hiştine
Nava berfê, serm û surê...
La jin korê, jin porkurê...
